ഷണ്ഡന്‍മാരുടെ ലോകത്തില്‍ പെണ്ണുടലുകളുടെ പ്രസക്തി

സിവിക് ചന്ദ്രന്റെ കവിത "അവസാനത്തെ അത്താഴം" പുതുകവികള്‍ തീര്‍ച്ചയായുംവായിക്കണം.(പച്ചക്കുതിര)വര്‍ത്തമാനകാലം കവിതയിലേക്ക് സംക്രമിപ്പിക്കുന്ന ഇന്ദ്രജാലം ഈ കവിതയില്‍ കാണാം. പരസ്പരം വേര്‍പിരിയുവാന്‍ തീരുമാനിച്ച ദമ്പതികള്‍ നക്ഷത്ര ഭോജനശാലയില്‍ അവസാനത്തെ അത്താഴം കഴിക്കവേ ഭീകരാക്രമണം നടക്കുന്നു.ഏക മകള്‍ ഹോസ്റലില്‍.എസ്.എം .എസ് പ്രളയം. വെടിയേറ്റു വീഴുന്നവര്‍.കമാണ്ടോകള്‍ ഇരുവരെയും രക്ഷിച്ചു ഒരുമുറിയില്‍ ആക്കുന്നു.ഒറ്റ കട്ടില്‍.പുറത്തു പെയ്യുന്നതൊടുവിലത്തെ പ്രളയമാകട്ടെ/പഴയ നോഹയുടെ പെട്ടകത്തിലിപ്പോള്‍ നമിരുവര്‍ മാത്രം ,ഒരാണും പെണ്ണും എന്ന് കവി എഴുതുന്നു. എഴുത്തുവിദ്യ വശമുള്ള ,അധികമൊന്നും എഴുതാത്ത ഈ കവിയെ ,ആ വിദ്യ കൈവശമില്ലാത്ത പുതുകവികള്‍ തീര്‍ച്ചയായും വായിക്കണം. കവിത്വത്തിന്റെ മാസ്മരികത അനുഭവിക്കാന്‍.
ഈ വിദ്യ തീരെ ഇല്ലെന്നു നമ്മെ ബോധ്യപ്പെടുത്തുന്നു "കിളിപേച്ചു കേള്‍ക്കവാ" എന്ന കഥ എഴുതിയ വിനോദ് നായര്‍. (ഭാഷാപോഷിണി.) തീര്‍ത്തും ദുര്‍ബലമായ ഈ കഥ യാതൊരു വായനാ സുഖവും നല്‍കുന്നില്ല. പക്ഷികളുടെ സംസാരം മനിസ്സിലാക്കാന്‍ കഴിയുന്ന ദിലീപന്‍.ആഖ്യാനത്തിന്റെ വശ്യത ഇല്ലായ്മയാണ് ഈ കഥയെ ദുര്‍ബലമാക്കുന്നത്. ഇതേ ആശയം മനോഹരമായി അവതരിപ്പിച്ച വി .ജെ .ജയിംസിന്റെ "ഭാഷാവരം" എന്ന കഥ ഈ കഥാകാരന്‍ വായിക്കുന്നത് നന്ന്. നല്ല കഥകള്‍ മാത്രം പ്രസിദ്ധീകരിക്കുന്ന ഭാഷാപോഷിണിയില്‍ ഇത്തരം കഥകള്‍ പ്രത്യക്ഷപ്പെടുന്നത് എങ്ങനെയാണ്?ഇതേ ജനുസ്സില്‍ പെടുന്ന കഥതന്നെയാണ് സുഹറ കൂട്ടായി എഴുതിയ " മറ്റൊരു പച്ച ബസ്സ് "എന്ന കഥ. (ദേശാഭിമാനി വാരിക).എന്നാല്‍ മാതൃഭൂമി പ്രസിദ്ധീകരിച്ച
"ടൈറ്റാനിക് "എന്ന പി.എസ് .റഫീക്കിന്റെ കഥ മനോഹരമാണ്.ഭാഷയുടെ ജൈവികത ഈ കഥയില്‍
തെളിഞ്ഞു കാണാം.പിക്ക് അപ് വാന്‍ ഓടിക്കുന്ന കസ്തുരിയുടെ ലോകം വായനക്കാര്‍ക്ക് അനുഭവിക്കാം.
ഷണ്ഡന്‍മാരുടെ ലോകം പോലും പെണ്ണുടലുകളെ വെറുതെ വിടുന്നില്ല. ഈ കഥയില്‍ തോമസ് മുതലാളി. മന്ദബുദ്ധിയായ മകള്‍ തിരളുന്നത് കസ്തുരിയെ ഭയപ്പെടുത്തുന്നു .ശില്പഭദ്രമാണ് ഈ കഥ. ബ്ലോഗനയില്‍ ഇത്തവണ ബെര്‍ലി തോമസ് ആണ്."കേരള ട്രാഫിക് ഗൈഡ് "എന്ന ബ്ലോഗ് പോസ്റ്റ്.
ആക്ഷേപ ഹാസ്യം ബെര്‍ലി തോമസിന്റെ എഴുത്തുമുദ്രയാണ്.